Galegolandia


Olladas con sorna, olladas con enfado, olladas ao exterior, olladas ao interior, olladas escépticas, olladas esperanzadoras, olladas que fan pensar, olladas para esquecer; olladas interrogantes; olladas declarativas; olladas exclamativas; olladas ao ar; olladas desde a terra; olladas de resignación; olladas de resistencia; olladas que non entenden; olladas que non se explican. Porque os “chascarrillos” son moitos e non todo vai ser perder falantes...

31.7.07

Valedor que non vale

Pois si que nos vai valer de moito o novo Valedor á vista da parrafada que solta na Voz hoxe e que no seu web, logo desta reformiña que lle fixero, non sei onde cara... a puxeron. Pouco menos vén dicir que o galego sexa unha maría... O que si atopei foi unha referencia ao seu "excelente" galego...
Imos de cu e non hai outra...

19.7.07

Galicia bilingüe



Outra vaca no millo... Agora chámanse Galicia bilingüe. Onde estaba esta xente cando gobernaba o PP? Estaban calados, non tiñan a quen dirixir os seus dardos e seguramente tiñan ardores ao non poder cuspir o seu desprezo cara á lingua. Agora si, xa teñen diana e por iso protestan. Alguén ten dúbidas de por que o PP se baixou do tren do Decreto a última hora?
Se por esta xentiña fose o galego sería folclore, chascarraschás e un día ao ano aló por maio.
Se son ben pensado, quizais co tempo caerán da burra e verán que o texto non dá para tanto, mais moito me temo que os imos escoitar moito nos próximos meses... A batalla lingüística está servida, a demagoxía preparada e os ollos pechos cara á realidade da lingua nos cativos...

5.7.07

Pactando que é xerundio

Agora que o ruxerruxe dos pactos locais recúa contareivos o que máis lle chamou a atención a este moucho durante a súa negociación: celebro que en todos eles a normalización lingüística apareza en calidade dunha área máis de traballo (ao pé de urbanismo, vivenda, acción veciñal...), mais logo todos sabemos que nin en orzamento, nin en peso real na acción de goberno ten a mesma importancia. Tampouco é mala cousa que a normalización sexa exclusiva dun único partido... e quen sabe se chegará o día en que sexa motivo de forte debate ou suspensión das negociacións (mmm, isto último, non sei non sei...)