El español es mi ley

Que Galicia Bilingüe ía reaccionar ao libro de Prolingua era algo bastante previsible, quizais non o era tanto que os fose preocupar como así semella. Ao mellor é que léndoo a algún se lle iluminaron as fazulas. Seica xa se barallan posibles títulos, 65 verdades sobre la lengua española podería ser un deles. Se o que queren é gabar as bondades e os beneficios do castelán, pois que o fagan. É máis, 65 verdades parénceme poucas, ben poucas. Que peten na porta do Instituto Cervantes ou na Fundación Telefónica que han atopar bibliografía abonda e inspiración salvadora.
Pero unha cousiña amigos bilingües: o libriño de Prolingua naceu para pór as cousas no seu sitio, para rebater os ataques e as calumnias por vós mesmos lanzados e creadas. Aquí sobre o castelán non se cuestionou nunca nada. Así que ánimo e xa podedes comezar a contar falantes por todo o mundo mundial (recoméndovos facer traballo de campo, por que non vos esparexedes polo mundo adiante por unha tempada e nos deixades en paz?), despois medir o seu peso no PIB e, por suposto, non vos esquezades de lle dedicar un espazo a ese meniño vigués que mellora o castelán en Sevilla. Velaí tamén un gran verdade.