Amañado o asunto do anuncio da señora repelente de Gadis imos con outra ollada á caixa tonta. Lembrades a que se montou hai un par de anos co do futbol dos sábados en galego cando La Sexta entrou en escena? por momentos parecía que o futuro da lingua pasaba polo número de saques desde o curruncho que os galaicos viramos antes de saírmos de troula. O resultado foron dous anos de futbol na TVG, en La Sexta (con opción multilingüe para os adiantados da TDT) e mesmo houbo algún partido que tamén se deu por Telecinco.

Pois ben este ano A Galega pasa da Liga e pasa do balompé sabatino. Apuntouse unicamente á grandeza da Champions e por pasar penso que aínda non pechou acordos nin co Celta nin con equipos galegos de categorías inferiores. Ou sexa antes pagarlle dereitos á UEFA que aos nosos clubs...

O caso é que La Sexta pechou a súa xenerosidade lingüística e xa non ofrece escolla de idioma nos seus partidos xusto, xusto cando máis precisa era. Disto decateime este sábado pasado.

Conclusión: rómpense máis de vinte anos de fútbol en galego os sábados. Ninguén vai dicir nada? Que di agora o PP? Xa non serve o que dicía en agosto de 2006? Xa non hai "desidia e ineficacia" nos dirixentes da canle? Xa o galego non é "fundamental para a promoción do noso idioma"? E La Sexta? ben pouco lles durou a arroutada...